Askotan entzuten dugu gaur egun udal tasa edo zerga bitxi bat jartzeko asmoa duela hemengo edo hango Udalak, eta gure jarrera beti izaten da berdina: hauek beti gauza geroz eta arraroagoak asmatzen!, ez dut inoiz horrelakorik ikusi.

Ba tira, Asteasuko artxiboan barna atzera jo dugu denboran zehar eta hara non topatu dugun tasa oso berezi bat: bizikleten gainekoa. Bai, bizikletak. 1942. urtean onartu zen Udalbatzarrean bizikleten gaineko tasa bat jasotzeko ordenantza berria.

Egia esateko ez zen lehenengo herria izan ordenantza hori onartzen zuena, askok jarri zuten. Txirrinda bat zuen edonorek ordaindu behar zuen. Herriko bizikleta guztiak Udalean erroldatu behar ziren eta matrikula plaka bat ematen zitzaien. Urtero 8 pezetako tasa bat ordaindu behar zen bakoitzeko. Bidean zehar matrikularik gabe ibiliz gero isuna 10 pezetakoa zela esaten du ordenantzak.

Ordenantza hau 1942. urtekoa bada ere, Asteasun gordetzen den lehenengo errolda 1944. urteko da. Orduan, 98 bizikleten alta eman zelarik.

Amagoia Piá

Irudia: Bicicletas Clásicas Leo